Aurten lehenengo aldiz, gabonetako eta neguko merkealdirako kanpaina bateratua aterako dugu Durangoko BERBARO, Elorrioko BARRIKETAN, Zaldibarko EIXU, Iurretako GEURIEN BAI eta Berrizko BERBIE euskera elkarteek. Euskeraren normalizazioa helburu badugu, merkataritza euskalduntzea pauso garrantzitsua dela deritzogu eta horretan dihardugu, baina euskalduntze prozesu honetan merkatariak eurak kontutan hartzeaz gain, oraingoan EROSLEA ere inplikatu nahi izan dugu. Guztiok garelako erosle eta eroslerik gabe ez dagoelako erosketarik, ez dago merkataritzarik. Horregatik bultzatu, animatu, zirikatu nahi zaituztegu zuok denok, erosleak zareten aldetik, eguneroko erosketak euskeraz egitera, euskalduna izanik ere beti erderaz egin dizun/diozun dendariari euskeraz berba egitera, dendaria erdalduna dela jakinda ere dendara sartu eta egun on! esatera... hitz gutxitan: eguneroko hartu-emanetan euskera erabiltzera.

Kanpaina honetarako aukeratutako lema Poltsa bete euskera(z) izan da; alde batetik, poltsa euskeraz bete dezazuela nahi dugulako eta, bestetik, ekimen honekin poltsa bete euskera lortu gura genukeelako.

Gaur bertan hasi eta abenduaren 17an eta 23an, eta datorren urteko urtarrilaren 4an esku-orriak banatuko ditugu denda inguruetan, bertan erosketak egiten dabiltzanak sentsibilizatzeko asmoz. Era berean, lema berdineko kartelak ere jarriko ditugu gure herrietako kaleetan. Bost elkarteen elkarlanari esker posible izango den kanpaina hau Abadiño eta Apatamonasteriora ere zabaltzeko asmoa daukagu.

Bukatzeko gogoratu, zuk ere poltsa bete euskera(z)!

BERBARO, BARRIKETAN, EIXU, GEURIEN BAI eta BERBIE euskera elkarteak.

Kanpaina honetan parte hartu nahi baduzu, telefono hauetako batera deitu:
BERBARO (Tel.946201918)
EIXU (Tel. 635717360)
BARRIKETAN (Tel.946231821)
GEURIEN BAI (618254796)
BERBIE (657710959)